2017年2月24日 星期五

[TRAVEL] 福岡六日五夜咁樣玩の福岡熊本由布院別府門司港北九州遊(下)

上集講左啲遊北九州嘅賽前準備後,今次就開始講下六日五夜嘅行程喇!
未看的按這裡:福岡六日五夜咁樣玩の賽前準備

Day 1:到達 → 博多(宿:Hotel SUNLINE福岡博多站前)
Day 2:熊本(宿:Hotel SUNLINE福岡博多站前)
Day 3:由布院(宿:庒屋之館)
Day 4:別府(宿:Hotel SUNLINE福岡博多站前)
Day 5:下關 → 門司港 → 天神(宿:Hotel SUNLINE福岡博多站前)
Day 6:滿載而歸歸港

Day 4:別府(宿:Hotel SUNLINE福岡博多站前)


Check out左之後就開始新一日嘅行程喇。
係由布院搭一個鐘車就可以去到別府。


唔好睇少別府駅前呢個人像呀。
佢係我地今次別府之旅-別府地獄溫泉-嘅創辦人,油屋熊八。佢仲對別府嘅觀光發展有好大貢獻咖。


講起別府一定會諗起佢地最有名嘅溫泉。
別府溫泉流出量係日本首屈一指,別府地獄溫泉就係一個可以比你一次睇晒咁多種類溫泉嘅旅程。
地獄八湯為海地獄、鬼石坊主地獄、山地獄、灶地獄、鬼山地獄、白池地獄、血之池地獄和龍卷地獄。
你可以參加Bus Tour等司機送你去每個地獄參觀,但時間太不彈性,所以我地都係決定自己去冒險。

另外,每個地獄都需要入場費¥400的,而買套票就是¥2100,也就說你看六個地獄的話買套票會較划算。


從以上嘅地圖黎睇,你一定以為一個地方就可以睇晒地獄八湯。錯!唔好比上面呢張圖擾亂你視線呀。
圖中最上個六個地獄係同血之池地獄同龍卷地獄有一定嘅距離,係需要搭車先去到的。
我個人認為別府地獄溫泉唔算易玩,係上網搵左無數咁多資料之後,決定左以下嘅行程。

首先係JR別府駅西口搭龜井巴士2、5或者41號車,到「海地獄前」下車,
從海地獄開始逛完前面六個地獄之後,走到「鐵輪」搭16號車到「血之池地獄前」玩最後兩個地獄,
最後係「血之池地獄」搭16號車返別府駅。

另一個玩法係由「鐵輪」玩起,最後先去到海地獄,但由於唔太順路,我就不推薦不多說了。


第一站海地獄。


海地獄係八湯入面佔地最大嘅一個,亦係我認為最震撼最令人嘩然的一個。
海藍色嘅九十八度高溫泉水,到處都煙霧迷漫,十分有氣勢!


鬼石坊主地獄就正正係海地獄旁邊,係個灰色嘅泥漿溫泉。


一個個泥漿氣泡噗通噗通跳起,好不有趣。
不停在想如果泥漿跳起嘅時候彈到我我會唔會馬上融化,哈哈。


山地獄也是泥漿溫泉,不過是泥黃色的,
這個有點嘔心,將是滂沱大雨時山路的泥。


山地獄園區有個小食亭,裡面都是賣用溫泉蒸氣而蒸熟的食物。
有蕃薯、票米、饅頭等等,而我手上的是蒸雞肉,雞肉很嫩滑,十分好味!


灶地獄係橙紅色嘅泥漿溫泉。


園區內有可以喝的溫泉水和可以蒸面的溫泉水蒸氣,聽說蒸面後會年輕了十歲。



除了溫泉供觀賞外,鬼山地獄還有很多惡魔睇場,小孩看到會害怕吧。


白池地獄就是普通的透明溫泉水。


感覺沒有甚麼特別,就是現場白濛濛一片。
然後此地獄有不同種類的魚,但因為牠們都長得很嘔心,所以就沒有拍了。


玩完前面六個地獄後就搭車去睇血之池地獄。
其實一路上都有好多香港遊客,所以遇到問題唔識路嘅都可以問或者直接跟住佢地尾哈哈。


血之池雖然唔係真正嘅血紅色,但一片磚紅色嘅溫泉水都一樣壯觀。

龍卷地獄就係血之池地獄旁邊,走幾步路就到。
呢個地獄嘅特別之處就係佢會好似龍卷咁係山口噴上黎,
但係每三十至四十分鐘先會噴一次,每次維持六至十分鐘。
我地入場個時已經開始緊,好彩接待處姐姐叫我地快啲跑入去睇,唔係就要白白等半個鐘了。

看完成個別府地獄溫泉大概用左三小時左右,
如果你時間充裕的話,我都好建議大家排半日黎玩,畢竟呢啲大自然景象香港好難睇得到。
但時間有限嘅話,我認為可以刪去血之池地獄和龍卷地獄,始終佢地比較遠,壯觀程度又冇前幾個誇張。
至少一定一定要行海地獄和鬼石坊主地獄,我覺得這兩個是最美最值得的。


每次到日本都一定要吃的Mister Dounts。


晚餐就係超市臨關門前嘅特價品,有和牛飯、炸雞、生果、大福等等,好豐富吧。


Day 5:下關 → 門司港 → 天神(宿:Hotel SUNLINE福岡博多站前)


第五日亦係最後一日嘅早上我地就去左下關,而去下關嘅主要目的就係去九州相當之有名嘅唐戶市場。
唐戶市場係新鮮漁貨市場,星期一至四嘅唐戶市場只係做一般嘅海鮮批發,遊客未必感到興趣,
但係逄星期五、六、日或者假期都會有活きいき馬関街活動,場內嘅店鋪都會有新鮮刺身、壽司等販賣。
唐戶市場同東京築地或是大阪黑門市場唔一樣嘅係佢冇因為多遊客而變得商業化,
庶民的價格就可以食到新鮮嘅食材,所以吸引到好多遊客特意到來。


唐戶市場
地址:山口県下關市唐戶町5-50
http://www.karatoichiba.com/

去下關唐戶市場嘅方法有好多,既可搭巴士又可以搭船,可惜網上交通資料零碎,令我一度想放棄!
但為了不讓睇過電視介紹後就一直好想去嘅爸爸失望只好硬著頭皮繼續搵最適合嘅交通路線,
而基於我地買左5日JR Pass,所以我地最後都係選擇搭JR去。

首先係博多搭特急去到小倉,係小倉轉普通JR到門司港站,跟住指示牌行一分鐘左右到門司港棧橋搭關門連絡船至下關,落船後向右手面方向一路行就到唐戶市場。

看似複雜又費時,但為了吃到新鮮又便宜嘅壽司,同埋感受唐戶市場嘅熱鬧氣氛就沒辦法了。


一入門口已經見到下關特產河豚,場內亦有售賣河豚刺身、河豚乾、燒河豚肉等等。



唐戶市場一樓主要售賣新鮮魚類,而外圍的室內店鋪多是乾貨、雪藏類,有唔少遊客都選購寄返香港。
二樓為食堂,旁邊亦有擺放餐桌比大家買完食物後坐係到慢慢品嚐。


市場內有塊區域特別熱鬧嘈吵,原來就係我地要搵嘅野!
一個個海鮮丼都係¥1000,只係港幣70蚊唔洗,係香港應該要百幾二百蚊先食到。


從來都未試過咁樣一舊舊夾啲壽司,
生魚片又厚又大塊,海膽三文魚子等軍艦壽司亦夠晒份量,並唔係超級市場嘅質素。


買完我地嘅早餐之後我地就拎左出去海傍到食,
雖則天氣有啲凍,但係太陽照射下總叫暖和,而且比場內吃這裡更有feel呢。


望住個大海食個新鮮有海水味嘅海膽飯,山長水遠轉幾程車入黎乜都抵返晒。


食完之後我地就搭船出返去門司港了。


門司港位於九州最北面,古時為外國航路據點及繁榮嘅貿易港,所以周圍充滿著西方懷舊建築。
而且位於海峽旁邊,係呢到除左可以欣賞西洋風嘅建築物外,仲可感受海港風情,特別悠閒寫意。


門司港環境幽美寧靜,而且有好多不同主題嘅博物館同藝術館,
但由於我地下午仲有更重要嘅行程,所以我地只係係出面影下相就沒有多留了。



更重要嘅行程就係要返去天神區瘋狂購物,
六日五夜嘅行程入面大多都係觀光,就只留左呢半日去最後衝刺!
天神好好行呢,除左附近有好多商場之外,地下街亦係不可忽略。

行行下仲見到Bake芝士撻,雖然一樣要排長龍,但人龍絕對比銅鑼祟光百貨的短!
新鮮出爐嘅芝士撻超級好味,外皮鬆脆,流出黎嘅芝士熱辣辣,可以一個人啪幾個呀。


季樂
地址:福岡市中央区西中洲6-8
http://kira.saga-ja.jp/

係福岡嘅最後一個晚上我地去左食蔡瀾大大力推介嘅季樂。


季樂係由出產佐賀牛嘅JA佐賀直營嘅佐賀牛料理專門店,係呢到可以品嚐到A5級佐賀牛料理。
店內二樓係自己動手嘅燒肉,三樓係由大廚為你下廚嘅鐵板燒,價錢當然是有分別囉。


季樂嘅總店位於佐賀,我地今次行程沒有去佐賀,所以只好去博多的分店。
博多季樂位於天神橋旁邊,零零舍舍有一幢銀色很顯氣派嘅建築就是了,就在一蘭總店斜對面特別好搵。
其中一張檯坐係落地玻璃隔壁,可以一邊燒肉一邊欣賞天神夜景,但,它是大檯,沒有我們的份兒了。


季樂有不同嘅佐賀牛套餐,亦可以單點。
套餐價錢大約為300至700元港幣一份,包括沙津、前菜、主菜、白飯、飲品等等。


我地點嘅套餐入面包括馬肉刺身,
馬肉刺身係福岡嘅特產,鼓起勇氣抱住一世人乜都要試下嘅心態去試……
食完發覺同普通生魚片刺身冇咩分別,唔係話特別好味,所以下次可以唔洗再食(掩咀)。


我地三個人分別叫左一份套餐,入面嘅肉類包括佐賀牛、佐賀和牛,仲有特級豚肉等。
最後埋單大約2000元港幣,以高級燒肉餐廳黎講,呢個價錢都係可接受範圍內,
而且餐廳環境舒適,每張檯都為包廂形式,服務周到,場內又沒有煙霧迷漫一浸浸的烤肉味,
所以十分推薦季樂比黎福岡想食燒肉嘅大家(記得提早打電話去預約呀)!

今次嘅行程雖然消耗左好多腦力,但係去完成壯舉後覺得一切都係值得呢。
九州之美實在唔能夠係短短六日好好欣賞得到,下次要安排更長嘅假期去玩埋九州其他地方呢。

除左小試牛刀學人打遊記外,仲小試埋以下嘅短片,想睇更多福岡遊資料嘅朋友仔就入去睇喇。














| adachung414@yahoo.com.hk | chungdada@yahoo.com.hk |




[TRAVEL] 福岡六日五夜咁樣玩の福岡熊本由布院別府門司港北九州遊(中)

上集講左啲遊北九州嘅賽前準備後,今次就開始講下六日五夜嘅行程喇!
未看的按這裡:福岡六日五夜咁樣玩の賽前準備

Day 1:到達 → 博多(宿:Hotel SUNLINE福岡博多站前)
Day 2:熊本(宿:Hotel SUNLINE福岡博多站前)
Day 3:由布院(宿:庒屋之館)
Day 4:別府(宿:Hotel SUNLINE福岡博多站前)
Day 5:下關 → 門司港 → 天神(宿:Hotel SUNLINE福岡博多站前)
Day 6:滿載而歸歸港

Day 3:由布院(宿:庒屋之館)

第三日會去由布院住一晚溫泉酒店,
所以一起身我地就執好晒行李,將個行李箱寄存係酒店,淨係帶左衫褲就輕輕鬆鬆出發嚕!


我地係搭之前提過好受歡迎唔劃位會有機會滿座嘅由布院之森去由布院。
係呢架車入面有小食便當買,仲有啲由布院之森列車嘅手信。
而最特別係佢會拎住個印住當日日期嘅列車牌周圍行問人洗唔洗影相,兩個鐘嘅車程可以話係唔會悶。


玩下睇下風景好快就去到由布院喇。
由布院唔算大同多野玩,最出名嘅就係條由布院溫泉街同埋金鱗湖。
沿住由布院溫泉街一直行就會到達金鱗湖,所以我地都係打算咁樣玩法!


由布院溫泉街話長唔長話短唔短,沿路有好多特色小店、手作雜貨、當地土產,又有啲小食餐廳等等。
我認為黎得呢啲咁慢活輕鬆嘅地方行程都唔好安排得太chur。
我見上網好多人話由布院一日遊,為左趕上火車來回而安排得一兩個小時去玩,太辛苦了!


我建議安排一晚住在由布院溫泉酒店,安排半日留在由布院溫泉街,
用心細看一下呢個純樸嘅小鎮,呼吸一下日本嘅新鮮空氣。呢個地方太值得了!


YUFUIN FLORAL VILLAGE
地址:大分県由布市湯布院町川上1503-3
http://floral-village.com/

行行下溫泉街見到一個童話小鎮,原來叫做Floral Village。
入面有好多好夢幻經常係故事書入面見到嘅小動物,仲可以買飼料餵佢地,
仲有好多同人高度差唔多嘅鋪頭,其中一間仲專賣Alice in Wonderland嘅精品!



望咩呀望。



千其唔好錯過呢個地方呀,入左黎真係有如置身於童話世界入面,相都有排影呀。



跟住啲指示牌同人流行多一陣就到左金鱗湖喇。
出發之前做過功課,欣賞金鱗湖最佳嘅時候係清晨嘅時候,
特別係秋天冬天氣溫下降嘅早上,趁煙霞仲未散開,加上湖面嘅映照,就彷似人間仙境一樣。

我知道自己定力唔夠,唔會成功倒榻咁早起身行過黎,
所以就安排下午行過黎欣賞下金鱗湖,但呢個景象依然冇令我失望呢。


行返去由布院駅嘅時候開始肚餓亦都開始掃街喇。
成條街甜點比熱食多,想食正餐飽一飽嘅都可以入餐廳食,而我地就選擇邊行邊食。


日本有名嘅Cremia雪糕係呢到唔難見到,公價¥500,依然係咁重牛奶味咁好味。


最後仲買左由布院嘅大熱必吃甜點B-Speak蛋糕捲返酒店食。
其實今朝一早去到嘅時候已經冇晒單件賣,淨返整條蛋糕捲,
掙扎左好耐之後就抱住食唔晒都要買黎試下嘅心態去買!(最後後悔了,後悔冇買多幾條……)


行返出由布院駅嘅時間大約係三點鐘,亦係我地溫泉酒店接送車岩岩好黎到嘅時候。
由布院好多溫泉酒店都位於山上,如果搭的士嘅話都只係五分鐘左右嘅路程,
雖然Google Map顯示行上去酒店都係二十分鐘左右,但係成條斜路基本上可以唔洗諗。
而我今日揀個間溫泉酒店就有接送服務,咁就可以慳返兩程的士嘅價錢,都咪話唔划算!



庄屋之館
地址:大分県由布市湯布院町川上444-3
http://www.yufuin-shoya.com/

由布院有好多溫泉酒店,所以最後決定呢間都算係盲選。
不過最主要佢符合我嘅要求,就係房間有私人風呂,同埋唔算出名、網上有關嘅評論唔算多。
點解揀唔出名呢?係因為太多人去個啲酒店服務同環境通常都太大眾化,未必可以感受到最地道嘅風味。


係抱住唔太了解、冇乜太大期望嘅心態下黎到庄屋之館,到達後估唔到有驚喜!
佢嘅建築十分日式,成個環境感覺好乾淨,雖然開左業二十年但一啲古舊嘅感覺都冇。
庄屋之館總共有十五間房,每間房都係一間獨立屋,但屋與屋之間仍有距離,可想言知佢佔地係有幾大。
每間房嘅設計同風格都唔同,私人風呂都有分為露天風呂、半露天風呂同內風呂,
所有房間資料都係佢官網有詳細說明,所以預約嘅時候可以慢慢去揀岩自己心水嘅房。

雖然有好多預約酒店嘅中介網站價錢會平少少同埋繁體中文比較容易睇,
但係預約溫泉酒店最好都係返佢地自己嘅官方網站,資料齊全同準確啲之外,
你亦都可以直接將你嘅要求(飲食要求、到達時間等等)同酒店講,唔洗經由第三者轉達。


我地今次揀左嘅房係ももの木,房間最多可以容納五個人,而且配上一個露天風呂。
晚餐會係餐廳進行嘅原故,所以一入房我地嘅床舖就已經整理好。


成間房間有分客廳同卧室,而且仲有廚房,可以話係完善嘅房間設備。
呀!庄屋之館係冇WIFI嘅,而且位於山上網絡覆蓋得比較差,所以…呃…難得一天輕鬆下不要玩手機吧。


我成個旅程最期待就係呢個私人風呂喇。
雖然最後去公眾浴池都係冇人,都係我一個人霸晒成個溫泉,但係自己房有一個真是爽。
訓之前浸一次起身之後再浸,夜晚望住星星同月亮個種清幽嘅感覺真係想將時間停止係個一刻到。

補充返關於庄屋之館溫泉嘅資料,另一個吸引到我揀呢間酒店嘅係佢靛藍色嘅稀罕泉質溫泉水。
係藍色嘅溫泉上仲彌漫住一層層水蒸氣,冇嘈吵玩樂嘅聲音,
一個人霸佔成個大浴池,係好少溫泉旅館可以比得到旅客嘅恬靜閒適感受。


而我地間房ももの木(圖中)仲同大浴池(圖左)只係相隔幾步路嘅距離,
係接近零度嘅天氣下,一浸完就可以馬上返到開住暖氣嘅房間,唔洗怕凍親,真係方便到極點。


訓醒一擘大眼就會見到嘅景象。



去到庄屋之館就食我嘅戰利品B-Speak蛋糕捲,果然係名不虛傳呀。
蛋糕鬆軟有好香嘅奶油味,中間嘅忌廉份量適中,
唔會太漏或許太少令到蛋糕口感太乾,成一百蚊嘅蛋糕捲係值得比嘅哈!


浸完個浴就差唔多時候食晚飯喇。
一去到前菜已經準備好晒。


今日嘅餐牌。
對於睇唔明嘅日文餐牌,令到上每一道菜都特別驚喜。


頭盤通常都係一道道食左都唔知咩黎嘅食物。


我十分欣賞呢個主菜。主菜係和牛同由布院嘅特色美食豐後豚,冇配上任何醬汁,
只係用鹽同檸檬去帶出兩種肉類最原始嘅味道同口感,又不油膩,十分好吃!


第二日嘅早餐依然係會席料理,見我地一黎就馬上上其他熱食,唔會令客人多等。


今次係庄屋之館嘅一晚真係好有驚喜,無論係款待、住宿,抑或係兩餐料理都感受到佢地旅館嘅用心。
小小規模嘅溫泉旅館亦唔怕有過多嘅旅客,無論係邊個時候都係寧靜舒服,聽到嘅亦只會係小鳥嘅叫聲。












| adachung414@yahoo.com.hk | chungdada@yahoo.com.hk |






Related Posts Plugin for WordPress, Blogger...