2017年2月22日 星期三

[TRAVEL] 福岡六日五夜咁樣玩の福岡熊本由布院別府門司港北九州遊(上)

上集講左啲遊北九州嘅賽前準備後,今次就開始講下六日五夜嘅行程喇!
未看的按這裡:福岡六日五夜咁樣玩の賽前準備

Day 1:到達 → 博多(宿:Hotel SUNLINE福岡博多站前)
Day 2:熊本(宿:Hotel SUNLINE福岡博多站前)
Day 3:由布院(宿:庒屋之館)
Day 4:別府(宿:Hotel SUNLINE福岡博多站前)
Day 5:下關 → 門司港 → 天神(宿:Hotel SUNLINE福岡博多站前)
Day 6:滿載而歸歸港

Day 1 到達 → 博多(宿:Hotel SUNLINE福岡博多站前)



由於我係機上面就買左周遊券,所以去到博多JR車站綠色窗口就即刻去兌換喇。
一直講綠色窗口綠色窗口,其實就係上圖呢個樣子,係車站到十分易認,所以唔洗驚搵唔到。
去到服務員姐姐會比一張紙你填,你係紙上填返你想邊一日搭邊一班車就可以。


之後姐姐就會比一大堆車票你,咁你之後幾日就唔洗再去煩買車票嘅嘢,慳返好多時間呢。
搞掂之後就去左酒店check in放低行李,之後就出黎搵好西吃了!


魚米迴轉壽司
地址:福岡県福岡市博多区博多駅中央街6-12 ヨドバシ博多4F(博多車站筑紫口)
http://www.genkisushi.co.jp/uobei/

位於博多車站附近有個叫YODOBASHI-HAKATA的大型電器行,
唔好見到地下賣電器覺得冇嘢買就走呀,除左有餐廳之外,其實入面仲有GU、ABC-Mart等好多嘢行呢。
而今晚去食嘅魚米迴轉壽司係係YODOBASHI-HAKATA嘅四樓,吸引到我大駕光臨嘅就係佢個鐵路軌道。


一共有三條軌道,每條嘅列車都係唔同款式。


係螢幕點完餐之後,你嘅食物就會係隨機一條跑道送到你面前,再係螢幕到禁個制架車就會返去咖喇!


呢間迴轉壽司價錢便宜,三個人都係食左¥3000左右!
雖然生魚片冇厚到好似係魚市場食咁,但食材總算新鮮。
除左壽司外仲有拉面、炸物等其他小食,選擇繁多,地點又就腳,所以極度推介大家黎又玩又食呢。


當時係博多車站出面有個叫光之城嘅匯演,好多日本人同遊客都係到留倩影,好不熱鬧呢。

Day 2:熊本(宿:Hotel SUNLINE福岡博多站前)


第二日就搭新幹線去熊本喇。
其實地震之後大家都知道熊本好多景點都受到嚴重損壞,
本來都唔打算去嘅,但媽媽一心想去睇下熊本,順便當支持幫忙振災一下,所以就安排左一日去喇。


係熊本車站已經有個大大個熊本標記-熊本熊。
另外仲比我發現到影相APP Foodie係熊本有個特別版相框,之前都係峇厘島見過峇厘島特別版相框呢!


淨係係車站已經可以玩好耐了哈哈。

出閘後就去Information Centre買張一日交通Pass,可以係一日之內任搭地面上交通工具如市電同巴士。
如果你諗住去幾個景點的話,呢張一日交通Pass可以話係十分抵買咖!


之後就搭市電去第一個景點喇。



熊本城
地址:熊本縣熊本市1-1(市電站「熊本城‧市役所前」下車)
http://kumanago.jp/

其實黎之前都知熊本城受到嚴重破壞,網上消息仲話要2047年先重開。
既然黎到,我地都好想去熊本城睇下。

而家熊本城已經全面關閉,而且用圍欄包圍住。
我地只可以睇到熊本城嘅外圍,亦都見到日本人點樣一磚一瓦去將呢個歷史文物重建。
唔係親身黎到都唔知呢場天災帶黎幾多傷害,望住一個咁偉大嘅建築物摧毀成咁,作為旅客都心裡苦。
天災無情,但人間有愛。希望天災唔好再降臨,熊本亦可以早日恢復以前繁盛嘅一面。


櫻之馬場城彩苑
地址:熊本市中央區二丸1番1-1號(市電站「熊本城‧市役所前」下車)
http://www.sakuranobaba-johsaien.jp/

之後就行左去隔離嘅櫻之馬場城彩苑。


入面有好多商場同餐廳,係醫肚同買手信的好地方!
櫻花小路嘅建築好有江戶時代嘅感覺,係呢到可以感受到古時嘅日本風情。


桂花拉麵總本店
地址:熊本縣熊本市中央區花畑町11-9(市電站「通町筋」下車)
http://keika-raumen.co.jp/

晏晝就去左食熊本有名的桂花拉麵。
門面細細,內部裝潢並不華麗,但這才是傳統日本的味道!
濃郁的豬骨湯底,彈牙的拉麵口感,入口即溶的豚肉,再加上一杯冰的麥茶,
一碗拉麵配上一份餃子或炒飯也不過是¥800左右,是上世做了甚麼好事才吃到這CP值這麼高的好西啊。


吃飽以後就趕去了下一個景點。
好熊不攔路,麻煩借過!


水前寺成趣園
地址: 熊本縣熊本市8-1(市電站「水前寺公園」下車)
http://www.suizenji.or.jp/

首先要說喔,這個公園是收費的。
值不值票價我就覺得好個人,其實裡面就沒甚麼看的,
但像我不太喜歡太城市化嘅地方,喜歡輕鬆點呼吸新鮮的空氣的話,呢個景點都值得一睇的。


水前寺成趣園係個充滿古典氣息嘅日式庭園,
入面有神社可以參拜一下,亦都可以係小攤檔買飼料餵下鴨仔同錦鯉。
呢到好多地方隨便影都好靚,相信如果春天秋天佈滿櫻花紅葉一定係另一番景象。


熊本熊辦公室
地址:熊本市中央區手取本町8番2號鶴屋百貨1樓
http://www.kumamon-sq.jp/

黎熊本又點可以唔參觀熊本熊辦公室呢?
係熊本熊辦公室入面有好多關於熊本熊嘅資料,亦都可以買到熊本熊嘅精品。
熊本熊表演更加係呢到最受歡迎嘅環節,黎朝聖之前記得上官網睇下熊本熊係你去個日有冇表演呀。


好唔好彩我去個日部長就冇黎探訪,唯有坐佢張檯扮下佢喇哈哈。


MKレストラン 下通店
地址:熊本縣熊本市中央區下通 1-10-3
http://www.mkrestaurants.co.jp/

爸爸突然說晚上想打下邊爐,於是就上網搵左間最近嘅火鍋店。
去到見到個名:「咦?呢間咁似泰國個間連鎖火鍋店?」既然行到過黎,就入去試下喇!
呢間火鍋店有三款食物:火鍋、點心、刺身。你可以揀你想食邊類食物,每個配搭價錢不一。
我地一心係想打邊爐,所以就淨係揀左火鍋一款。食材種類唔算多,但勝在有啲幾特別幾個濟嘅款式。
價錢算便宜,特別想讚個到啲小女生服務很好,唔識英文都儘量幫忙。但,唔,可試可唔試。


晚上返博多車站時見到有一大條人龍,原來係來自一間賣牛角包嘅鋪頭。
見到啲日本女仔一大袋一大袋紙袋咁買走,麻麻地牛角包嘅我都買左幾個黎試下!
一共有三個口味:原味、朱古力、紫薯。牛角包又鬆脆又重牛油味, 細細個唔會太飽,係宵夜最佳小食呀。












| adachung414@yahoo.com.hk | chungdada@yahoo.com.hk |






沒有留言:

張貼留言

Related Posts Plugin for WordPress, Blogger...